這本書是日本京都大學的社會學學者大澤真幸同橋爪大三郎的對話，有少少中大出版的《宗哲對話錄》的影子，可以進行對讀。
作者從社會學的角度分析基督教的誕生，他認為因血緣或地緣而形成的小型簡單原始共同體，在與自然保持共生關係時，會出現自然發生式的毛術或多神教。然而，一旦有異族入侵，或是成為多民族帝國時，這種毛術或多神教的自然崇拜和特殊習俗便無法興盛，因而會出現超越民族或部族，具妥協性的普世宗教，世界宗教。
書中最有趣的地方是作者像普通人一樣對聖經充滿疑問，提問的問題都幾有意思，例如問神點解要創造惡？點解神會後悔創造人，然後落洪水？點解神要創造犯錯的我們？神一時決定的事物，可以在後來改變嗎？神在審問亞當夏娃時冇問到蛇的意見就處罰佢，對蛇公平嗎？點解舊約有先知，但自律法學者出現後會式微？點解故鄉在拿撒勒的耶穌，卻在遙遠的南方伯利恆出生？
另外，作者亦指出部份似是而非的聖經內容，例如最古老的福音書，馬可福音根本沒有記載耶穌復活，只是形容洞穴空無一人，亦無講耶穌點出世，反而係其後福音書先有記載，點解作為最早記載耶穌的文獻會冇寫，反而其後福音書先有提及？
另外，耶穌其實冇自稱自己係神的兒子，反而在猶太人的語言，自稱人子只係一個普通人叫自己的方法，究竟耶穌有冇認自己係神的兒子呢？再者，耶穌都冇話自己係基督，照聖經說法應該係「只講把這件事藏於你心」同埋「耶穌囑咐門徒，不可對人說他是基督」，似乎又冇一句耶穌說我是基督的句子出現，定係耶穌有意隱誨地講呢？
受審時，耶穌都冇正面答彼拉多佢係神的兒子，只係講你說是就是。有人話耶穌客西馬尼園禱告叫過「父呀」，但作者發現以利沙見到以利亞升天都會叫「我父呀」(列王紀下2:12)，以色列王都有叫以利沙做「我父呀」(列王紀下6:21)其實係一種對長輩的稱呼，未必係表示自己係神的兒子。
然而作者認為耶穌這個人應該是真實存在的，因為睇福音書佢話感受到一個人格的一貫性，如果真係冇呢個人照理冇可能咁連貫。作者覺得耶穌實際上可能鍾意大吃大喝痴飲痴食，因為佢發現新約記載耶穌經常作客，例如「人子來了，也吃也喝，人又說他是貪食好酒的人」，又與稅吏罪人做朋友，性格比較奇怪。
作者指出其實聖經係無地獄呢個概念，只係講犯罪會被火燒，其實聖經有提過地獄，在馬太、馬可、路加、雅各書同彼得後書有講，但係都係同火有關，的確冇形容到好詳細究竟地獄係一個咩地方。
針對一些典型的問題，作者都有提出，例如點解神唔一開始赦免罪人，而要用耶穌降生呢件事叫人悔改，用一個令人難以信服的方法去叫人悔改，比較奇怪。再者，作者覺得假如耶穌一開始知自己會復活，例如佢知自己將要領受苦杯，跟住同時又知自己係神的兒子，咁所受的苦只係皮肉之痛，而且是可以預期的，似乎又未必真係咁痛苦？作者甚至質疑耶穌有雙重人格或者解離性身份障礙的疾病。佢同情猶大，因為佢係真正完成神計劃的關鍵人物，猶大福音都有記載，但冇被列入聖經一部份。
最後，作者亦都覺得聖經有D故事好奇怪，例如路加福音第16章第8節，有關一個管家穿櫃桶底的故事，但經文竟然話「主人就誇獎這不義的管家作事聰明，因為今世之子，在世事之上，較比光明之子，更加聰明。」做錯事反而被讚？似乎令人狐疑，馬利亞故事中，馬大精心預備飯菜，馬利亞陪耶穌，但耶穌反而讚馬利亞，公平嗎？仲有一樣作者感到奇怪，就係明明新約書信出現比起福音書早，但係排列次序竟然將書信放後面，但舊約又係跟時序的，難以解釋。
希望之後我可以為以上問題搵到合理的解釋。
沒有留言:
張貼留言