中學會考高考讀西史，有關以巴衝突，一直都有個疑惑，就係教科書似乎將好多野都簡單化左，例如:
1. 點解無啦啦打緊又會簽到停戰協定，之後又會打返？
2. 點解有D在位者會想打或者和解？教科書會話在位者眼見死傷無數，打左咁年，於是希望推動和解，係咪真係咁簡單？
我覺得，人的政治決定好多係ideology或者利益驅使，而且每個決定都受好多因素影響，所以對於教科書的一兩句解釋，一直都想搵出答案，究竟以巴點解會衝突，又係唔係只係因為宗教、土地問題擾攘左咁多年呢？
睇左呢本書，有少少答案。
1. 眾所周知，以色列係好好打，逢戰必贏，有咩因素令到佢會選擇和解或者讓步呢？
據作者分析，其實以色列議會行比例代表制，所以少數政黨好易當選，變相冇咩一黨獨大的局面，好多時候被迫要考慮埋少數派意見，導致政府出現左hardliners同softliners，所以佢地之間的爭權某種度會左右以色列對外關係，佢地每個決定都想平衡hardliners同softliners的立場。
2. 猶太人點樣返中東？
佢地一開始係買左巴勒斯坦D人的地，同埋揀肥沃土地而避開religious sites，買左成7%的土地，之後立國後再打。
3. 點解Palestine咁重要？
因為佢係Suez Canal的一道屏障，保持列強的勢力平衡同埋貿易和平。相比之下，Palestinian比較分散，各自為政，英國分而治之令佢地冇Jews咁有leadership，此消彼長。
立國之後，兩個地方都同鄰近國家在國際政治上角力，埃及同以色列都曾就以巴問題鬥爭過一輪，佢其實想透過打仗黎到迫使其他國家介入，盡快搵到個解決方法，結果最後蘇聯軍事幫埃及，以色列同美國更加close，Palestine就有幾個組織慢慢冒起。
4. 民族自決或者民主可否解決問題？
好難，因為以人數巴勒斯坦佔多，如果民主選舉以色列就輸硬，所以只能用武力去佔領D地方。
5. 誰對誰錯？
曾經聽過一個信耶穌的同事表示以色列殺平民在所難免，但係巴勒斯坦隊D平民出黎佢地先被迫殺佢地，聽完之後其實會覺得同事思想都幾恐怖，道聽途說就當真，簡單化左成件事，仲當自己係專家，所以最慘唔係無知，而係知少少以為自己看透世事。
其實，書中有講到，以色列對於區內經濟生活有好多限制，霸佔農地自用或者做軍事用途，又唔比百姓開井取水再加上控制用水供應，點樣耕田呢？變左Palestine的經濟愈來愈倚賴以色列，人民積怨日深，生活困苦。
另外有時候會聽到講法係Palestine武裝份子背信棄義，傾緊和平又襲擊，事實上，PLA係一個概稱，裡面其實都係分法塔赫同埋哈馬斯仲有好多分支，所以一面傾和平唔代表另一方同意，好多時候係hardliners見到softliners有成果，怕自己勢力被邊緣化而發動襲擊壞搞對家，等自己多D籌碼，阿拉法特的法塔赫相對溫和，哈馬斯就希望取回所有領土，是強硬派，經常發動襲擊。
所以由於好多勢力，導致到阿拉法特都控制唔到哈馬斯想點，形成左state within a state的問題，所以令佢講和難度高左好多，因為佢代表唔曬所有人。
同時間以色列打仗都會燒埋自己，因為國內就開戰意見分歧，變左兩派人的鬥爭，撕裂國家，所以好多時和解完又再打過，或者在位者落選又有新人事新作風，例如拉賓或者阿拉法特死左(阿拉法特據聞係中釙元素毒死，即係居里夫人發現個種物質)。
奧斯陸協定本來差少少就成功，可惜最後唔單止冇成功，仲加劇左個問題，因為intifada呢種起義，令到更多襲擊或者示威，以色列覺得和解好似冇用又改以強硬對付，變相令Palestine的hardliners籌碼大增，邊緣化左想和解個面，令到局面一發不可收拾，雙方都未必估到最後結果係點，最慘係法塔赫的阿拉法特主張和解但又被強硬派哈馬斯騎劫，雙方都怕對方會成功，所以千方百計阻止，令到和解進程一拖再拖，哈馬斯覺得阿拉法特企響以色列個面，所以唔肯妥協。
由於兩個國家內部都陷入撕裂，所以比較難對付，以色列甚至起左道牆去區隔兩個族群，叫disengagement policy，後面阿拉法特死左，就由阿巴斯Abbas繼續同哈馬斯周旋。好多次和解都被雙方的hardliners影響到冇左。
作者認為雙方都冇一個unified leadership and coherent strategy，以色列最大考慮係security，因為如果次次和解撤軍都有人襲擊，又係曬氣。巴勒斯坦忍左咁多年，又好易有示威暴動出現，加埋阿拉伯之春，更加希望有民主選舉，但係以色列人太少又選唔贏，所以唔肯放權。
另外，佢認為最重要係因為冇 political will and capacity of Israeli and Palestinian leaders to implement the solution，從以上的分析都可見一斑，問題未解決的同時，以色列又繼續去搞settlements，Palestine又繼續忍，所以矛盾愈來愈深。
作者認為再咁落去就會令以色列佔據的地方內的Palestinian變到好似南非Apartheid咁樣，種族分離，備受歧視。
最新情況: 幸好巴勒斯坦在近年成功立國，幸未再有大型戰爭，加沙地帶由哈馬斯管治，西岸由法塔赫管治，上年甚至哈馬斯亦都決定加沙交由巴勒斯坦政府管返，和平進程慢慢開展。(維基百科)
可惜作者冇咩提到2010年之後的和平進程係點樣開展，只係講緊佢地恩怨點樣黎，呢樣係比較可惜。
沒有留言:
張貼留言